بسم الله نبدأ
المقادير
نص كيس مكرونة فرن مسلوقة (طبعا ممكن تزودي الكمية براحتك)
طماطم قطع صغير
فلفل اخضر قطع صغير
زيتون مخلي مقطع
البشاميل
5 معالق دقيق
حتة زبدة كبيرة
مكعب مرق (ممكن اللي مش بيحبوه يستبدلوها بكوباية شوربة)
3 كوبايات لبن وكوباية مية
ملح
فلفل
رشة جنزبيل بودر
رشة قرفة بودر
نص معلقة صلصة
انا دايما بجيب البشاميل الجاهز بس المرة دي حبيت اجرب البيتي وطلع رائع جداااا وطعمه حلو اوي
الطريقة
نخلط المكرونة مع الخضار
نبتدي نجهز البشاميل
نجيب حلة ونحط فيها حتة الزبدة والدقيق ونقلب كويس ويدوب الدقيق يصفر
تحطي اللبن والمية وتقلبي كويس جدا لحد ما الدقيق يمتزج فيهم
بعد كدة نضيف مكعب المرق والملح والفلفل والجنزبيل والقرفة
ونقلب كويس جدا علي نار هادية لحد ما البشاميل يتقل
انا مش بحب البشاميل يبقي تقيل اوي بحبه معقول عشان بيبقي كريمي وحلو اوي لما المكرونة تستوي
بعد ما يتقل البشاميل بضيف له نص معلقة صلصة بتدي لون ونكهة جميلة
كدة يكون البشاميل جاهز
بجيب الصنية واحط فيها شوية بشاميل واضيف عليهم المكرونة والخضار وافردها كويس في الصنية
بعدين بصب البشاميل علي المكرونة واساوية بحيث يغطي السطح كله
وممكن تضيفي جبنة موتزاريلا او تركي وممكن لا
انا المرة دي ما ضفتش حاجة
وتدخليها الفرن لحد ما تتمساك والخضار تستوي يعني ربع ساعة او تلت ساعة حسب الفرن بتاعك
وبعدين بولع الشواية عشان تاخد الوش الجراتان الجميل
دة الشكل النهائي
ودي صورة كمان
دكتور أية
مشاهدة ملفه الشخصي
إرسال رسالة خاصة إلى دكتور أية
البحث عن كل مشاركات دكتور أية
إضافة دكتور أية إلى الإتصالات الخاصة بك
الخميس أغسطس 16, 2012 1:11 pm